Bòn Natâle,

con a neive c’a ingianca i Trei Frê,

e a gente che pe stradda a camminn-a

co naso co-a stissa e e man ze-è.

Bòn Natale ai vëgi, che tante n’avëivan da dî,

de cöse belle e d-i tempi passê,

bastieiva avei tempo pe stali a sentî…

Bòn Natâle a chi no gâ de câ e de pân,

c-o puesse ìmpîse a pansa e scädâse e mân.

Bòn Natâle ai figgieu che oua, quande nasciân,

han zà i euggi averti e san quexi parlâ,

purian fâ qualcosa pe in pittinin sto mondo cangiâ?

Bòn Natâle anche a chi o n-a lasciòu,

in posto voeu in to cheu o n-è restòu.

Bòn Natâle a-o marotto, a chi l’è solo e sofferente,

n-a preghiera e in sorriso,

n-a bonn-a parolla,

e subito mëgio o se sente.

Anche o Bambin, solo che o pìe,

a Madonna a-o caresse, e lê u ghe rìe.

Dìvan i vëgi che o cianze dei figgieu

o l’è comme a rozâ,

basta na’ bagiâ de sô pe fâla sciügâ.

Bòn Natâle a tütti quanti,

e che i euggi duxi do Bambinetto

no ne fassan mancâ ne l’anno ch’emmu davanti

a salute, a pâxe e l’affetto.

Emilia Molinelli