Gh’è in paise picin ai pê du Munte Arfê

U pâ u Presepiu, c’u fümme grixu c’u sciôrte dai camin,

a funtanetta cu a neive in gïu e u pisciuêlu zeô.

A neive gianca a fa lüxe in te sta nötte de lün-na e de stelle:

in t’a caban-na de paggia e de prie

gh’è in bœu c’u regümme e n’asenin,

che cu sciou c’u sciôrte da u nâso ascâdan u Bambin.

San Giüseppe u l’amïa inzenuggiou a sœu Santa Famiggia

L’è grande u compitu c’u Segnö u g’ha afidou.

A Madon-na a ghe caresse i pesin,

a nin-na nan-na a ghe canta, cu na voxe coxi duxe

che fito s’adorme u Bambin.

Tütta dentro me sentu remesciâ davanti a Ti, Santo Bambin,

e in pô de côse urieiva dîte e dumandâ.

Grassie pe a vitta, u sû, l’ægua e u pan,

pe a mæ famiggia e u mæ nevettin,

parenti e amixi proteggili tütti, ancœu e duman.

Grassie perchè davanti a chi zerche a caitæ

me sentu fortünâ, e dividdo u mæ pan a meitæ!

Se ti pœu agiütta chi l’è in dificultæ,

segge pe u lou, a salütte o i dinæ.

A chi l’è solo stagghe vixin,

æ lacrime asciüghighe o cau Bambin.

Grassie pe æsse vegniüo in mêzo a nuiâtri,

a purtâ ancon i n’ôtta a vitta, a paxe e l’amö.

Da ultimo, urieiva ancun in girotondo

cun tütti i figgiœu du mondo, grandi e picin,

gianchi, neigri, cu i œggi a mandorla e cui rissulin,

che se tegnan pe man e cantan insemme

“Tu scendi dalle stelle, o Re Bambin”.

Bun Natâle

Milly e Gianni